【白蔥仔公主】EP03-公主v.s.殺手 白話字POJ字幕 Pe̍h-chhang-á Kong-chú
ฝัง
- เผยแพร่เมื่อ 3 ก.ค. 2024
- 公主陷入殺手掌握之中--囉，公主危險--矣!! 台語限定童話喜劇，適合闔家觀賞、老少咸宜，白話字POJ / 漢羅 雙字幕
[Podcast]
SoundOn
bit.ly/ChKaL_SO
Spotify
spoti.fi/48jD2tI
KKBOX Podcast
bit.ly/ChKaL_KK
Apple Podcast
apple.co/3HZyfD3
以下內容是漢羅原稿，有需要歡迎ta̍k-ke來參考。
POJ goân-kó ê pō͘-hūn, in-ūi siū tio̍h jī-sò͘ ê hān-chè, bô-hoat-tō͘ oân-chéng khǹg tī chia, nā ū su-iàu oân-chéng ê bûn-chiuⁿ, chhiáⁿ sóa kha khì goán ê Koaⁿ-hong bāng-chām khòaⁿ, chin ló͘-la̍t!
cho-kang-a-lang.github.io/
【漢羅版】
王后派hō͘白蔥á公主ê chit ê查埔人，是較早伊tī詐騙集團ê時陣，熟似--ê 1 ê烏社會大歹人，chit táu chhōe伊來接ê chit ê khè-suh真簡單：「你kā公主chhōa入去樹林á內面，無人chhōe會tio̍h ê所在，ka tu̍h ho͘死，án-ne to̍h有...3萬。」
「Eh eh eh！你是m̄-bat行情nih，chit款khè-suh，攏mā是100萬起跳！」
「Hăⁿ--àⁿ？Chiah貴？Ah無50萬？」
「你到底是beh chhōe我刣人，a̍h是beh chhōe我刣價haⁿh？」
落尾chit條in chhiâu kah 99萬，王后koh想beh ka開6個月ê票，m̄-koh殺手驚伊會跳票，堅持kan-na beh收現金，出發進前to̍h愛先la̍p 7成。
白蔥á公主kah chit ê殺手裝ê護衛，行走入去樹林á內底，公主沿路ná行ná食，行無半點鐘久，to̍h kā 2人份ê便當食--去-ah。殺手看tio̍h伊ê便當去hông sut了了，淡薄á吞忍bē loeh，準備beh kā伊藏--起-來ê刀拔--出-來，雄雄1肢白蔥蔥ê手，伸入去伊ê外套內底，kā hit支刀khiang--去，to̍h看tio̍h白蔥á公主笑微微講：「Ŏa-à，chit支刀真水neh，借我sńg--1-ē。」殺手規ê人戇神--去，過3秒鐘，chiah想tio̍h ài趕緊去kā刀搶--轉-來，目1-ē chîn，soah看tio̍h公主kā刀giâ懸懸，歡喜kah tī hia ná笑ná跳舞，chit款天真ê gín-á性，hō͘咱chit ê殺手先生--à，看1下soah去ho͘迷--去，koh過5秒鐘，伊chiah雄雄回魂，目睭kheh-kheh teh hia大力hàiⁿ頭：「M̄-tio̍h，我ê任務是beh ho͘死，ài較專心--leh，我是phú-lo͘h--ê！」伊目睭thí開，滿面殺氣，soah發見白蔥á公主m̄知走去toeh--ah，伊趕緊喝：「公主，你tī tó位？」想講，kám會藏teh樹á叢內底？伊to̍h附近ê樹á叢，1欉1欉ka péng看māi，chit時，soah m̄知去踢tio̍h啥，規ê人跋跋--倒，ai-ioh，痛kah beh死，伊ê腳去ho͘ liô 1 sûn 3寸長ê孔嘴，血直直流，伊注神ka看，竟然是伊hit支刀，hō͘人插teh樹根頂頭！「Ái-iā，chit ê該死ê白蔥á公主，敢kā我創孔，che gún祖傳ê寶刀，你凊彩kă捎去sńg，koh烏白擲害我受傷，氣死人--ah！」
白蔥á公主chit-má人食飽飽，tī樹林á內se̍h來se̍h去，伊想講：「Teh厝--ni̍h khû chiah久--ah，第1 kái走kah chiah遠ê所在，chiâⁿ好sńg neh。」Tī林á內，伊看tio̍h較早m̄-bat看--過ê大隻蝶á，「Ŏa-à」，看tio̍h花chōa親像虎kāng款，黃--ê、烏--ê 1 chōa 1 chōa，有夠大隻ê虎頭蜂，伊mā是「Ŏa-à」，koh看tio̍h 1尾蛇，頭展--開ká-ná飯匙ê形，伊mā是「Ŏa-à」。伊看tio̍h啥攏感覺chiok新奇，根本to̍h無注意tio̍h講，原本tòe teh身軀邊ê hit ê護衛早to̍h無--去-ah，伊tú-chiah kā人ê寶刀凊彩捎去sńg，koh烏白擲，伊mā ka放bē記，上hàm--ê是，伊是為tio̍h啥代誌出門--ê，mā攏總bē記--chit。
伊一直sńg kah beh暗á，chiah想tio̍h講：「Ah，我kám會走siuⁿ遠？」雄雄發見伊行m̄知路--ah，到chit陣伊chiah想tio̍h講，beh出門ê時，王后有派1 ê護衛陪tī伊身軀邊。「Ĕ？Hit ê人nah ē走無--去-ah？Hò͘，chit kho͘ nah ē chiah無責無任haⁿh！Ah m̄是beh chhōa我去食好料--ê？」公主kā手機á the̍h--出-來，想beh看1-ē-á網路地圖，soah發見chia根本都無信號，伊kā手機á giâ懸懸，chia比--1-ē，hia比--1-ē，天公khah án怎拜mā無信號。「Nah ē án-ne--lah，無網路我是beh án怎活--落-去，救人o͘h，救人o͘h！」
白蔥á公主tī樹林á內底án怎都chhōe無路，過無偌久，天色to̍h規ê暗--落-來，伊行規工，實在有夠thiám，1 ê人tī hia，強beh哭--出-來，chit時，伊看tio̍h面頭前有1間大別莊，he別莊koh有kah游泳池。公主趕緊去挵門，「有人tī--leh-無？有人tī--leh-無？」挵規晡久soah攏無人應。伊對窗á門ka看--入-去，內底暗眠摸，看--起-來是無人tī--leh。窗á無鎖，公主直接to̍h ka peh--入-去，蠟燭ka點--leh to̍h四界看，無彩che厝起kah chiah大間，無糖無鹽koh無電視，灶腳無米mā無點心，架á頂ê小說破糊糊，ang-á冊soah chhun he第2集。白蔥á公主目睭眼tio̍h壁角hia有1腳大桶á，內底攏是原子筆，he原子筆hoⁿh貯kah tīⁿ-tīⁿ-tīⁿ，公主to̍h凊彩捎1支起來看。原子筆ê頂頭有1粒愛心，he愛心ka chhi̍h--lòe，筆尾to̍h會thóng--出-來，to̍h ē-tàng寫字。白蔥á公主chŏaⁿ gia̍h原子筆，teh人壁頂烏白chō，伊原本想beh畫1隻豬，chiah畫無2撇，to̍h發見，ĕ？Che筆nah ē chiah歹寫？Koh換2支筆，ta̍k支都chiok歹寫，chiah-nī歹寫ê筆，in是án怎ài chhoân chiah濟支？Kám講，che筆nā收集100支，to̍h ē-tàng換限定版ê便當？白蔥á公主ná tī hia烏白想，手ná chiān，厝--eh啥物物件攏ka摸摸看看--leh，櫥á門1-ê-á 1-ê ka phah ho͘開，總算是去hō͘伊chhiau tio̍h 2罐果子醬hām 3包俗pháng，想講規工to̍h kan-na早起食hit 2粒便當，chín腹肚chiok iau--ê，湯匙á the̍h--leh，果子醬to̍h ka挖起來食，2罐1-ē-á to̍h sut了了，sòa--落-來，he俗pháng 1塊接1塊chiⁿ teh嘴--eh，a̍h無物件通配，愈食愈感覺無滋味。
Chit ê時陣，外面有幾ê烏影，liam腳liam手，bih tī外口偷看。In攏總有7 ê人，ta̍k-ê攏生kah矮tàiⁿ-tàiⁿ，m̄-koh漢草koh chiâⁿ好，武腯武腯án-ne。In bih tī外口講：「是án怎有生份人teh咱兜？」
「Koh凊彩捎咱ê物件去食！」
「伊一定是賊á！」
「Lín ka看，伊皮膚有夠白，kám講…伊是….」
「白賊！」
「白賊m̄是chit ê意思--lah！」
原來，chit間別莊是in兜，in今á日工課tăⁿ做soah，tú到厝beh食飯，soah發見厝--ni̍h ke 1 ê生份人。In其中1 ê尿緊kah bē顧--eh，a̍h m̄管生份人猶tī厝內，to̍h beh入去顧便所，想bē到鎖匙插入去鎖匙孔，soah發見門去hông ùi內面鎖--起-來。伊大聲挵門，「Eh！你是siáng？你是án怎tī goán兜內底，koh kā門鎖--起-來？」
內底hit ê生份人soah顛倒ka問講：「Beh chhōe siáng，主人無tī--leh-ō͘！」
Hăⁿ？你koh知影你m̄是主人o͘h？白蔥á公主kā門phah開，in 7 ê人隨to̍h chông--入-去，kā chit ê生份人圍--起-來。有1 ê人看tio̍h桌頂he食無了ê俗pháng，to̍h問講：「你是án怎kā goán ê物件食kah chhun án-ne？He是goán 7 ê人，按算beh食2工ê gia̍h neh！」
「Hăⁿ--à？Lín nah ē食hiah少，莫怪ē生kah chiah-nī矮！飯ài加食--寡，m̄通揀食，知--無？」
Chit寡人足氣--ê，一直問講：「你是siáng？」「你是án怎tī goán壁頂畫1隻豬？」
公主看tio̍h chit幾ê人án-ne歹chhèng-chhèng，趕緊the̍h出伊ê絕招，嘴舌thó͘--1-ē，目睭nih--1-ē，1 ki腳khiàu--起-來，koh比1 ê啾咪，然後自我紹介，講：「我是有180萬fans ê白蔥á公主，chiú-mi！♥」
想bē到圍tī伊身軀邊chit幾ê矮á冬瓜，完全無hō͘伊面子，應講：「我無愛白蔥á！」「我較ài蒜頭！」「芋á！」「芫荽！」，in竟然m̄-bat白蔥á公主，mā m̄知啥物是啾咪，chit招對in無效--lah。公主koh問：「Án-ne，lín kám知影tó位有網路信號？」
「Hăⁿ？He是啥？」
Chit聲白蔥á公主chiah知影，原來chit ê樹林á內面，根本to̍h無網路信號，chit寡人平常時mā無teh看電視，chiah會m̄-bat伊chit ê網chhèng，甚至in內底看--起-來上細漢ê hit ê，koh問講：「伊講 ê hit ê fans是啥haⁿh？」另外1 ê ka應講：「He in鬥陣--ê-lah！」「Hăⁿ？In鬥陣--ê有180萬ê？」
Chit 7 ê人，kā白蔥á公主圍kah密chiuh-chiuh，beh走都走bē離，in koh the̍h伊食chhun ê俗pháng，tu去伊面頭前，問伊講：「Goán ê食物--leh？你講--ā！你講--ā！你講--ā！」公主一世人m̄-bat tú-tio̍h chit款範勢，伊有淡薄á驚，in一直teh問講：「Goán ê食物--leh，你講--ā，你nah ē m̄講話？」Chit時，白蔥á公主雄雄笑--出-來，伊chit-má chiah想tio̍h講，chit幾ê人，chiah-nī興食，án-ne應該足好鬥陣。伊ùi伊ê lak袋á，khêng出7塊梅á餅，雙手捧--leh，hō͘ in 1人ni 1塊，1234567，ĕ？Nah會有1 ê人無分tio̍h餅？原來是最後1塊餅，公主iau-sâi kâng食食--去，無食--tio̍h hit-ê teh激氣，走去邊--á teh使性地。Ah ū食tio̍h餅ê hit 6 ê--leh？Ĕ--è，梅á餅吞lŏe腹肚--ni̍h，m̄-bat食--過ê好滋味，心內是歡喜koh好奇，自然to̍h無koh再受氣！ - ตลก
![แล้วแต่เวรแต่กรรม-ครูศรีหนุ่ม [OFFICIAL MV]](http://i.ytimg.com/vi/Xide0fkAS8g/mqdefault.jpg)
故事誠趣味呢！
向望逐家聽了會當心花開，食百二
我叫是厝內會有一隻野獸，叫公主愛嫁予伊…😆
閣有會曉唱歌的茶鈷?
Gún a-chí bé ang-á-chheh mā tiāⁿ-tiāⁿ khiàm thâu chi̍t chip iah-sī tiong-kan kúi-nā chip =w=
Án-ne lí to̍h chai-iáⁿ, i seⁿ-ji̍t ê sî ài sàng siáⁿ-mih lé-bu̍t--ā. (▰˘◡˘▰)
@@chokangalang 🤣🤣🤣
Chhiáⁿ-mn̄g pe̍h-chhang-chhang kap pe̍h-siap-siap tī sek-chúi sióng ū siàⁿ bô kâng？
Pe̍h-chhang-chhang sī chiok pe̍h, pe̍h-siak-siak sī pe̍h kah ē hoat-kng ê kám-kak án-ne.🤔
@@chokangalang kám-siā. Goân-lâi sī siak-siak. Ló͘-la̍t.