ಲುಕಾ ಪರ್ಮಾಣೆಂ ಸುವಾರ್ತಾ
ಅಧ್ಯಾಯ್ 23
ಜೆಜು ಪಿಲಾತಾ ಹುಜಿರ್
23:1 ತಿತ್ಲ್ಯಾರ್ ತಿ ಸಗ್ಳಿ ಸಭಾ ಉಠ್ಲಿ ಆನಿ ತಾಕಾ ತಾಂಣಿಂ ಪಿಲಾತಾ ಮುಖಾರ್ ವ್ಹೆಲೊ.
23:2 ಆನಿ ತಾಚೆರ್ ಫಿರ್ಯಾದ್ ಮಾಂಡುನ್ ತೆ ಮ್ಹಣಾಲೆ: “ಹಾಣೆಂ ಆಮ್ಚೇ ಪರ್ಜೆಕ್ ಉಪ್ರಾಟಾಯ್ತಾನಾ, ಸೆಜಾರ್ ಚಕ್ರವರ್ತಿಕ್ ಖಂಡಣಿ ದಿಂವ್ಕ್ ಆಡಯ್ತಾನಾ ಆನಿ ಆಪುಣ್ ಕ್ರೀಸ್ತ್, ಏಕ್ ರಾಯ್ ಮ್ಹಣ್ತಾನಾ ಆಮಿ ಹಾಕಾ ಧರ‍್ಲಾ.”
23:3 ಪಿಲಾತಾನ್ ಜೆಜುಕ್ ವಿಚಾರ‍್ಲೆಂ: “ತುಂ ಜುದೆವಾಂಚೊ ರಾಯ್?” ಜೆಜುನ್ ಜಾಪ್ ದಿಲಿ: “ತೆಂ ತುಂಚ್ ಸಾಂಗ್ತಾಯ್.”
23:4 ತವಳ್ ಪಿಲಾತಾನ್ ಪ್ರಧಾನ್ ಯಾಜಕಾಂಕ್ ಆನಿ ಲೊಕಾಚ್ಯಾ ಜಮ್ಯಾಕ್ ಮ್ಹಳೆಂ: “ಮ್ಹಾಕಾ ಹ್ಯಾ ಮನ್ಶಾ ಥಂಯ್ ಕಸಲೊಚ್ ಗುನ್ಯಾಂವ್ ಮೆಳನಾ.”
23:5 ಪುಣ್ ತೆ ಆನಿಕ್‍ಯಿಾ ಚಡ್ ದಾಂಬುನ್ ಮ್ಹಣಾಲೆ: “ಆಪ್ಲೆ ಶಿಕೊವ್ಣೆನ್ ಜುದೇಯಾಚ್ಯಾ ಸಗ್ಳ್ಯಾ ಲೊಕಾಕ್ ತೊ ಉಚಾಂಬಳ್ ಕರ‍್ತಾ. ಗಾಲಿಲೆಯಾಂತ್ ಸುರು ಕರ‍್ನ್, ಹಾಂಗಾ ಪರ್ಯಾನ್ ತಾಚಿ ಚಳಾವಳ್ ಪಾವ್ಲ್ಯಾ.”
ಜೆಜು ಹೆರೊದಿ ಹುಜಿರ್
23:6 ಗಾಲಿಲೆಯಾ ಮ್ಹಳೆಂ ತೆಂ ಆಯ್ಕುನ್ ಪಿಲಾತಾನ್ ತಾಂಚೇಲಾಗಿಂ ವಿಚಾರ‍್ಲೆಂ: “ಹೊ ಮನಿಸ್ ಗಾಲಿಲೆಯಾಗಾರ್‌ವೆ?”
23:7 ಆನಿ ತೊ ಹೆರೊದಿಚ್ಯಾ ಅಧಿಕಾರಾಖಾಲ್ ಪಡ್ತಾ ಮ್ಹಣ್ ತಾಕಾ ಕಳಿತ್ ಜಾತಚ್, ತಾಣೆಂ ತಾಕಾ ಹೆರೊದಿಂ ಸರ್ಶಿಂ ಧಾಡ್ಲೊ. ಹೆರೊದ್ ತ್ಯಾ ದಿಸಾಂನಿ ಜೆರುಜಲೆಮಾಂತ್‍ಚ್ ಆಸ್ಲೊ.
23:8 ಜೆಜುಕ್ ಪಳೆವ್ನ್ ಹೆರೊದಿಕ್ ಭೋವ್ ಚಡ್ ಸಂತೊಸ್ ಜಾಲೊ. ತಾಚೇ ವಿಶ್ಯಾಂತ್ ತಾಣೆಂ ಜಾಯ್ತೆಂ ಆಯ್ಕಲ್ಲೆಂ ದೆಕುನ್, ಜಾಯ್ತೊ ಕಾಳ್ ಥಾವ್ನ್ ತೊ ತಾಕಾ ಪಳೆಂವ್ಕ್ ಆಶೆತಾಲೊ. ತಾಣೆಂ ಕೆಲ್ಲೆಂ ಏಕ್ ಪುಣ್‍ಯಿಾ ಆಚರ್ಯೆಂ ಆಪುಣ್ ಪಳೆತಲೊಂ ಮ್ಹಳ್ಳ್ಯಾ ಭರ್ವಶಾನ್ ತೊ ಆಸ್ಲೊ.
23:9 ತಾಣೆಂ ಜೆಜುಕ್ ಸಬಾರ್ ಥರಾಂನಿ ಸವಲಾಂ ಕೆಲಿಂ, ಪುಣ್ ತಾಣೆಂ ಎಕಾಕ್‍ಯಿಾ ಜಾಪ್ ದಿಲಿನಾ.
23:10 ಪ್ರಧಾನ್ ಯಾಜಕ್ ಆನಿ ಶಾಸ್ತ್ರಿ ಮುಖಾರ್ ಯೇವ್ನ್, ಕಠಿಣಾಯೆನ್ ತಾಚೆರ್ ಗುನ್ಯಾಂವ್ ಮಾಂಡ್ತಲೆ.
23:11 ಶೆಕಿಂ ಹೆರೊದಿನ್ ಆಪ್ಲ್ಯಾ ಶಿಪಾಯಾಂ ಸವೆಂ ಮೆಳೂನ್ ತಾಚಿ ಖೆಳ್ಕುಳಾಂ ಕೆಲಿಂ ಆನಿ ಅಕ್ಮಾನ್ ಕರ‍್ಚೇ ಖಾತಿರ್ ತಾಕಾ ಧವೊ ದಗ್ಲೊ ನ್ಹೆಸೊವ್ನ್, ತಾಕಾ ಪಿಲಾತಾ ಸರ್ಶಿಂ ಪಾಟಿಂ ಧಾಡ್ಲೊ.
23:12 ತವಳ್ ಪರ್ಯಾನ್ ಎಕಾಮೆಕಾ ದುಸ್ಮಾನ್ ಮ್ಹಣ್ ಆಸ್ಲಲೆ ಪಿಲಾತ್ ಆನಿ ಹೆರೊದ್ ತ್ಯಾ ದಿಸಾ ಥಾವ್ನ್ ಪರ್ತ್ಯಾನ್ ಈಷ್ಟ್ ಜಾಲೆ.
ಜೆಜುಕ್ ಮೊರ್ನಾಚೆಂ ಫರ್ಮಾಣ್ ದಿತಾತ್
23:13-14 ಪಿಲಾತಾನ್ ಆತಾಂ ಪ್ರಧಾನ್ ಯಾಜಕಾಂಕ್, ಮ್ಹಾತ್ಭಾರ‍್ಯಾಂಕ್ ಆನಿ ಲೊಕಾಕ್ ಸಾಂಗಾತಾ ಆಪೊವ್ನ್, ತಾಂಚೇಲಾಗಿಂ ಮ್ಹಳೆಂ: “ಹೊ ಮನಿಸ್ ಲೊಕಾಕ್ ಉಪ್ರಾಟುಂಕ್ ಲಾಯ್ತಾ ಮ್ಹಣ್ ಸಾಂಗುನ್ ಹಾಕಾ ತುಮಿ ಮ್ಹಜೇ ಸರ್ಶಿಂ ಹಾಡ್ಲಾ. ಪುಣ್ ಪಳೆಯಾ, ಹಾಂವೆಂ ತುಮ್ಚೇ ಮುಖಾರ್‌ಚ್ ತಾಚಿ ತನ್ಕಿ ಕೆಲಿ. ತರಿಪುಣ್ ತುಮಿ ತಾಚೆರ್ ಮಾಂಡ್ಲಲ್ಯಾ ಫಿರ್ಯಾದಿಂ ವಿಶ್ಯಾಂತ್ ತಾಚೇ ಥಂಯ್ ಮ್ಹಾಕಾ ಕಸಲೊಚ್ ಗುನ್ಯಾಂವ್ ಮೆಳ್ಳೊನಾ.
23:15 ತಶೆಂಚ್ ಹೆರೊದಿಕ್‍ಯಿಾ ಮೆಳ್ಳೊನಾ; ದೆಕುನ್ ತಾಣೆಂ ತಾಕಾ ಆಮ್ಚೇ ಸರ್ಶಿಂ ಪಾಟಿಂ ಧಾಡ್ಲಾ. ತರ್ ಮೊರ್ನ್ ಫಾವೊ ಜಾವ್ಚೆಂ ತಸಲೆಂ ಕಿತೆಂಚ್ ತಾಣೆಂ ಕೆಲೆಂನಾ ಮ್ಹಣ್ ಸ್ಪಷ್ಟ್ ಜಾತಾ.
23:16 ದೆಕುನ್ ಹಾಂವ್ ತಾಕಾ ಶಿಕ್ಷಾ ಲಾಯ್ತಾಂ ಆನಿ ಸೊಡ್ತಾಂ.”
23:17 sentence na
23:18 ಪುಣ್ ತ್ಯಾ ಸಗ್ಳ್ಯಾ ಜಮ್ಯಾನ್ ಬೊಬ್ ಮಾರ‍್ನ್ ಮ್ಹಳೆಂ: “ಹಾಕಾ ಕಾಡ್, ಬಾರಾಬಾಸ್ಸಾಕ್ ಆಮ್ಕಾಂ ಸೊಡ್ನ್ ದೀ.”
23:19 ಶ್ಹೆರಾಂತ್ ಹಾಣೆಂ ಉಠಯ್‍ಲ್ಲೇ ಕಾಟ್ಕಾಯೆಕ್ ಆನಿ ಕೆಲ್ಲೇ ಖುನಿಯೆಕ್ ಲಾಗುನ್ ಹಾಕಾ ಬಂಧೆಂತ್ ಘಾಲ್ಲೊ.
23:20 ಪಿಲಾತ್ ಜೆಜುಕ್‍ಚ್ ಸೊಡಿಜಯ್ ಮ್ಹಳ್ಳ್ಯಾ ಇರಾದ್ಯಾನ್ ಪರ್ತ್ಯಾನ್ ಜಮ್ಯಾಲಾಗಿಂ ಉಲಯ್ಲೊ.
23:21 ಪುಣ್ ತೆ ‘ಖುರ್ಸಾಯ್ ತಾಕಾ, ಖುರ್ಸಾಯ್ ತಾಕಾ!’ ಮ್ಹಣುನ್ ಬೊಬಾಟ್ ಮಾರುಂಕ್ ಲಾಗ್ಲೆ.
23:22 ತಿಸ್ರೇ ಪಾವ್ಟಿಂ ಪಿಲಾತ್ ತಾಂಚೇಲಾಗಿಂ ಮ್ಹಣಾಲೊ: “ತಾಣೆಂ ಕಿತೆಂ ಅನ್ನ್ಯಾಯ್ ಕೆಲಾ? ಮೊರ್ನಾಚಿ ಶಿಕ್ಷಾ ಫಾವೊ ತಸಲೊ ಗುನ್ಯಾಂವ್ ತಾಚೇ ಥಂಯ್ ಮ್ಹಾಕಾ ಮೆಳನಾ. ದೆಕುನ್ ತಾಕಾ ಜೆರ್ಬಾಂದ್ ಮಾರೊವ್ನ್ ಹಾಂವ್ ತಾಕಾ ಸುಟ್ಕಾ ದಿತಾಂ.”
23:23 ಪುಣ್ ತೆ ಆನಿಕ್‍ಯಿಾ ತಾಳೊ ಪಿಂಜುನ್ ತಾಕಾ ಖುರ್ಸಾರ್ ಮಾರಿಜಯ್ ಮ್ಹಣ್ ಉಪ್ರಾಟ್ಯೊ ಬೊಬೋ ಘಾಲುಂಕ್ ಲಾಗ್ಲೆ. ಆನಿ ಕ್ರಮೇಣ್ ತಾಂಚೆಂ ಹಠ್ ಜಿಕ್ಲೆಂ.
23:24 ತಾಂಣಿಂ ಮಾಗ್ಲಲ್ಯಾ ಪರ್ಮಾಣೆಂಚ್ ಕರಿಜಯ್ ಮ್ಹಣುನ್ ಪಿಲಾತಾನ್ ಹುಕುಮ್ ದಿಲಿ.
23:25 ಖೂನ್ ಆನಿ ಕಾಟ್ಕಾಯ್ ಕೆಲ್ಲ್ಯಾಕ್, ತಾಂಚೇ ಆಪೇಕ್ಷೇ ಪರ್ಮಾಣೆಂ ತಾಣೆಂ ಸೊಡ್ನ್ ದಿಲೊ, ಆನಿ ತಾಂಕಾಂ ಜಾಯ್ ತಶೆಂ ಕರುಂಕ್ ಜೆಜುಕ್ ತಾಂಚೇ ಅಧೀನ್ ಕೆಲೊ.
ಜೆಜುಕ್ ಖುರ್ಸಾರ್ ಮಾರ‍್ತಾತ್
23:26 ಜೆಜುಕ್ ಘೆವ್ನ್ ವೆತಾಸ್ತಾನಾ, ಸಿರೆನ್ ಗಾಂವ್ಚೊ ಸಿಮಾಂವ್ ನಾಂವಾಚೊ ನಾಡಾಕ್ ಗೆಲ್ಲೊ ತೇ ವಾಟೇನ್ ಪಾಟಿಂ ಯೆತಾಲೊ ತೊ ತಾಂಕಾಂ ಮೆಳ್ಳೊ. ತಾಕಾ ತಾಂಣಿಂ ಧರ‍್ಲೊ ಆನಿ ಜೆಜು ಪಾಟ್ಲ್ಯಾನ್ ಖುರಿಸ್ ಘೆವ್ನ್ ವಚುಂಕ್ ತಾಚ್ಯಾ ಖಾಂದಾರ್ ತೊ ದಿಲೊ.
23:27 ವ್ಹಡ್ ಏಕ್ ಲೊಕಾಜಮೊ ಜೆಜು ಪಾಟ್ಲ್ಯಾನ್ ವೆತಾಲೊ. ತಾಂಚೇ ಮಧ್ಲ್ಯೊ ಥೊಡ್ಯೊ ಸ್ತ್ರಿಯೋ ತಾಚೇ ಖಾತಿರ್ ರಡ್ತಾಲ್ಯೊ ಆನಿ ವಿಳಾಪ್ ಕರ‍್ತಾಲ್ಯೊ.
23:28 ಜೆಜುನ್ ತಾಂಚೇ ಕುಶಿನ್ ಘುಂವೊನ್ ತಾಂಕಾಂ ಸಾಂಗ್ಲೆಂ: “ಜೆರುಜಲೆಮಾಚ್ಯಾ ಧುವಾಂನೋ! ಮ್ಹಜೆ ಪಾಸತ್ ರಡನಾಕಾತ್. ಪುಣ್ ತುಮ್ಚೇ ಪಾಸತ್ ಆನಿ ತುಮ್ಚ್ಯಾ ಭುರ್ಗ್ಯಾಂಬಾಳಾಂ ಪಾಸತ್ ರಡಾ.
23:29 ಅಶೆಂ ಮ್ಹಣ್ಚೆ ದೀಸ್ ಯೆತಲೆ. ‘ವಾಂಜ್ಡ್ಯೊ ಪ್ರಸೂತ್ ಜಾಂವ್ಕ್ ನಾತ್‍ಲ್ಲ್ಯೊ ಆನಿ ಪಾನೊ ದಿಂವ್ಕ್ ನಾತ್‍ಲ್ಲ್ಯೊ ಸ್ತ್ರಿಯೋ ಭಾಗಿಚ್ ಸಯ್!’
23:30 ತವಳ್ ತೆ ಪರ್ವತಾಂಕ್ ಮ್ಹಣ್ತಲೆ: ‘ಆಮ್ಚೇರ್ ಪಡಾ’ ಆನಿ ದೊಂಗ್ರಾಕ್ ‘ಆಮ್ಕಾಂ ಧಾಂಪುನ್ ವ್ಹರಾ’
23:31 ಜರ್ ಜಿವ್ಯಾ ಲಾಂಕ್ಡಾಂಕ್ ಅಶೆಂ ಘಡ್ತಾ, ತರ್ ಸುಕ್ಯಾ ಲಾಂಕ್ಡಾಂಕ್ ಕಿತೆಂ ಘಡನಾ ಜಾಯ್ತ್?”
23:32 ಜೆಜು ಸಾಂಗಾತಾ ದೋಗ್ ಆಪ್ರಾಧ್ಯಾಂಕ್‍ಯಿಾ ತಾಂಣಿಂ ಜಿವೆಶಿಂ ಮಾರುಂಕ್ ವ್ಹೆಲೆ.
23:33 ‘ಕಟ್ಟೆಂ’ ನಾಂವಾಚೇ ಸುವಾತೆಕ್ ಪಾವ್ತಚ್, ಥಂಯ್ ಜೆಜುಕ್ ತಾಂಣಿಂ ಖುರ್ಸಾರ್ ಮಾರ‍್ಲೊ; ಆನಿ ತ್ಯಾ ದೋಗ್ ಅಪ್ರಾಧ್ಯಾಂಕ್‍ಯಿಾ, ಎಕ್ಲ್ಯಾಕ್ ತಾಚ್ಯಾ ಉಜ್ವ್ಯಾಕ್, ಅನ್ಯೆಕ್ಲ್ಯಾಕ್ ದಾವ್ಯಾಕ್ ಖುರ್ಸಾಯ್ಲೊ.
23:34 ಆನಿ ಜೆಜು ಮ್ಹಣಾಲೊ: “ಬಾಪಾ, ತಾಂಕಾಂ ಭೊಗ್ಶಿ. ಕಿತ್ಯಾಕ್ ತೆ ಕಿತೆಂ ಕರ‍್ತಾತ್ ತೆಂ ತೆ ನೆಣಾತ್.” ಉಪ್ರಾಂತ್ ಸೊಡ್ತಿ ಘಾಲ್ನ್ ತಾಚಿಂ ಆಂಗ್‍ವಸ್ತುರಾಂ ತಾಂಣಿಂ ಆಪ್ಣಾಂ ಮಧೆಂ ವಾಂಟೆ ಕರ‍್ನ್ ಘೆತ್ಲಿಂ.
23:35 ಲೋಕ್ ಲಾಗ್ಸಾರ್ ರಾವುನ್ ಪಳೆತ್ ಆಸ್ಲೊ. ತಾಂಚೆ ಮುಖಂಡ್ ತಾಕಾ ಕೆಂಡುನ್ ಮ್ಹಣ್ತಾಲೆ: “ಹೆರಾಂಕ್ ತಾಣೆಂ ಬಚಾವ್ ಕೆಲೆ; ಹೊ ದೆವಾಚೊ ಕ್ರೀಸ್ತ್, ವಿಂಚ್ಲಲೊ, ವ್ಹಯ್ ಜಾಲ್ಯಾರ್, ತೊ ಆಪ್ಣಾಕ್‍ಚ್ ಬಚಾವ್ ಕರುಂ!”
23:36 ಶಿಪಾಯ್‍ಯಿಾ ತಾಚಿಂ ಖೆಳ್ಕುಳಾಂ ಕರ್ತಾಲೆ.
23:37 ತೆ ತಾಚೇ ಸರ್ಶಿಂ ವಚುನ್, ತಾಕಾ ಆಂಬೊಟ್ ವಾಯ್ನ್ ದೀವ್ನ್ ಮ್ಹಣ್ತಾಲೆ: “ತುಂ ಜುದೆವಾಂಚೊ ರಾಯ್ ಜಾಲ್ಯಾರ್ ತುಕಾಚ್ ಬಚಾವ್ ಕರ್.”
23:38 ತಾಚ್ಯಾ ಮಾತ್ಯಾ ವಯ್ರ್ “ಹೊ ಜುದೆವಾಂಚೊ ರಾಯ್” ಹಿಂ ಉತ್ರಾಂ ಬರೊವ್ನ್ ಘಾಲ್ಲಿಂ.
23:39 ಉಮ್ಕಾಳಾಯ್‍ಲ್ಲ್ಯಾ ಅಪ್ರಾಧ್ಯಾಂ ಮಧ್ಲೊ ಎಕ್ಲೊ ತಾಚಿ ನಿಂದಾ ಕರ‍್ನ್ ಮ್ಹಣಾಲೊ: “ತುಂ ಕ್ರೀಸ್ತ್ ವ್ಹಯ್ ಜಾಲ್ಯಾರ್ ತುಕಾಚ್ ಆನಿ ಆಮ್ಕಾಂಯಿಾ ಬಚಾವ್ ಕರ್.”
23:40 ತವಳ್ ದುಸ್ರೊ ಜಾಪ್ ದೀವ್ನ್ ತಾಕಾ ಭೆಷ್ಟಾಂವ್ಕ್ ಲಾಗ್ಲೊ: “ತುಕಾಯಿಾ ತಿಚ್ ಶಿಕ್ಷಾ ಫಾವೊ ಜಾಲ್ಯಾ ಆಸ್ತಾನಾ ತುಂ ದೆವಾಕ್ ಕಾಂಯ್ ಭಿಯೆನಾಯ್‍ವೇ?