Ek wil weer verlief raak op jou.
Ek wil weer verlief raak op jou.
Sagte lippe van soete sondes,
sagte hande wat hoop oor my rug streel.
Harde hande deur my sagte hare,
sal jy my nog liefhê in my ouer jare?
{Eerlik}
Deur die dronk doolhof van die lewe,
het ons mekaar verloor.
Die koue winter se harde woorde -
hoe het ons mekaar verloor?
Sal ons mekaar weer vind?
Sal ons mekaar ooit weer vind?
Die liefde se lawwe lag,
hoekom moet ons op die lewe wag?
Ek wil weer verlief raak op jou.
Ek wil weer verlief raak op jou.
Hou my vas asof jy my nooit wil los;
soen my weer en vat my asem weg.
Hou my hand vas asof jy my gaan verloor,
sit styf teen my sodat ek jou weer kan ruik.
Die lang gras van die lewe
krap aan ons liefde,
verantwoordelikhede vir die toekoms en die hede,
die werk, die sweet -
soms maak dit dat ons mekaar se liefde vergeet.
Ek wil weer verlief raak op jou.
Ek wil weer verlief raak op jou.