Enlace ao Powerpoint utilizado na conferencia:
docs.google.com/presentation/d/18Qb7KJF0xuswkJ-6Zq0QKXXFGr_C4EpE/
No Salón de Actos do Pazo de San Marcos tivo lugar a conferencia “Mulleres, ciencia e tecnoloxía: unha historia interminable”.
No marco da programación con motivo do décimo cuarto día da Ciencia en Galego, Igaciencia organiza esta actividade destinada ao alumnado de educación secundaria co obxectivo de dar a coñecer a relación entre ciencia, mulleres e tecnoloxía. Con ela agardamos contribuír, na medida das nosas posibilidades a rescatar e revalorizar a presenza das mulleres que nos precederon, que fixeron posible iso que hoxe chamamos ciencia e tecnoloxía, pero tamén queremos reivindicar o labor das mulleres, no pasado e no presente, pola imprescindible aportación ao avance e benestar do xénero humano, tanto desde as súas profesións como desde o traballo cotiá e doméstico.
A doutora en Química e premio UVIGUALA da Universidade de Vigo, Mari A. Lires, impartiu esta testemuña na que participaron máis de 150 alumnos e alumnas do IES Ollos Grandes de Lugo, do IES Faro das Lúas de Vilanova de Arousa, do Ánxel Fole de Lugo, do CPR Plurilingüe A Inmaculada, tamén de Lugo, e do IES Plurilingüe San Rosendo de Mondoñedo.
Queremos destacar algúns dos aspectos que, pola relación que teñen coa temática que se vai abordar, nos levaron a solicitar a cooperación de Mari A. Lires:
Catedrática de Física y Química de secundaria, profesora da Universidade de Vigo do departamento de Didácticas especiais e vicepresidenta do Seminario Interdisciplinario de Estudos de Xénero da Universidade.
Galardoada, en 2017, co Premio Uviguala 2017 da Universidade de Vigo, polo seu compromiso coa igualdade de xénero. Forma parte do Comité de Sabias da Cátedra de Feminismos 4.0 da Universidade de Vigo, cuxo obxectivo é introducir a mirada feminista na nova sociedade dixital.
Formou parte da Unidade “Mulleres e Ciencia” do Parlamento de Galicia.
En 2016, comezou a formar parte da "Sección de Ciencia, Tecnoloxía, Natureza e Sociedade" no Consello da Cultura Galega
Coautora do libro As científicas e a súa historia na aula.
Dirixiu dous Proxectos do Campus do Mar: Achegas das mulleres á sustentabilidade do mar e O Mar das mulleres.
A deputada de Cultura e Normalización Lingüística, Iria Castro, destacou o valor de dar a coñecer “o traballo de mulleres que cambiaron ou melloraron a historia coas súas disciplinas científicas. Para o estudantado, e principalmente para o estudantado feminino, é necesario escoitar a mulleres que inspiren e que deixen ver que os teitos de cristal poden romperse”.