મકાઈ અને શિમલા મરચાંનું શાક (Sweet Corn Capsicum Masala) એ સ્વાદિષ્ટ અને પૌષ્ટિક શાક છે, જે અમેરિકન મકાઈના દાણા અને કેપ્સિકમથી બને છે. આ શાક બનાવવા માટે લીલી મકાઈના દાણા અને કેપ્સિકમને સૌપ્રથમ બટરમાં ચાર મિનિટ સુધી શેકવામાં આવે છે. તે પછી, ટમેટાં, આદુ, લસણ, મરચાં અને કાજુની પ્યુરી બનાવવામાં આવે છે અને પ્યુરીને લાલ મરચાં પાવડર, હળદર, ધાણાજીરું, શેકેલો જીરું પાવડર અને મીઠાં સાથે તેલ અને બટરમાં શેકીને ગ્રેવી તૈયાર કરવામાં આવે છે. ત્યારબાદ તેમાં બટરમાં શેકેલા મકાઈના દાણા અને શિમલા મરચાં નાખીને આ શાક તૈયાર કરવામાં આવે છે. આ વાનગી ને રોટલી, નાન અથવા પરાઠા સાથે પીરસવામાં આવે છે, અને તેમાં વિટામિન્સ અને ફાઈબર ભરપૂર માત્રામાં હોવાથી તે આરોગ્ય માટે પણ લાભદાયી છે.