"لە چاوەڕوانیدا"
لە چاوەڕوانییا
کەڵکەڵەی کۆمەڵێ ئەگەر
لە سەرم ئەدا
ڕەنگە لە قیتارەکەدا
جانتاکەی دەستی بیرچووبێ و
ناونیشانەکەی من و
مۆبایلەکەی لێ ون بووبێ
ئیدی ئارەزووی نەمابێ و وتبێتی؛
بەختی لەگەڵ نەرمەبارانا نییە
ڕەنگە بە شتێکی کوتوپڕەوە
سەرقاڵ بووبێ
یان بە گەشتێکەوە بۆ باشوور
تاکو سەردانی خۆر بکا
لای بەیانی تەلەفۆنی کردووە و
من لە ماڵەوە نەبووم
چوومە دەرەوە تا گوڵی گاردینیا و
دوو شووشە شەراب بکڕم
بۆ ئەم ئێوارەیەی هەردووکمان
ڕەنگە نێوانی لەگەڵ
هاوسەرەکەی پێشووی خۆیا تێکچووبێ
لەسەر یادەوەرییەکانیان و
پاشان سوێندی خواردبێ
چییتر پیاوێک نەبینێ بە خولقاندنی
یادەوەری هەڕەشەی لێ کا
یا ڕەنگە لەڕێیدا بۆ لای من
خۆی بە تەکسییەکا کێشابێ و
چەند هەسارەیەکی
کاکێشانەکەی کووژابنەوە
ئێستا لەژێر چارەسەری
ئارامبەخش و وەنەوزا بێ
ڕەنگە بەر لە هاتنەدەرەوەی
لە خودی خۆی
سەیری ئاوێنەی کردبێ و
دەستی لەو دوو هەرمێ گەورەیە دابێ
کە شەپۆل بە کراسە
ئاوریشمەکەی ئەدەن و
بە حەسرەتەوە وتبێتی:
ئاخۆ کەس هەیە بێ لە خۆم
شایانی مێینایەتیم بێ؟!
یا ڕەنگە بەڕێکەوت بە
خۆشەویستییەکی پێشوویدا تێپەڕیبێ
کە هێشتا لێی ڕزگار نەبووبێ و
لەگەڵیا بۆ شێوی ئەم ئێوارەیە چووبێ
لەوانەشە مردبێ
چونکە مەرگیش، وەک
من لەپڕا عاشق ئەبێ
مەرگیش وەک من
حەزی لە چاوەڕوانی نییە
-مەحموود دەروێش
وەرگێڕانی؛ ئازاد بەرزنجی