کنفیوژن
منی هیالءِ اِسکرینءَ باز فولڈر اَنت، پَچ اَنت
اکس بُن گرنت ءُ لبز مور بنت ءُ پِر رِچنت
یک فولڈرےءَ واب انچو بتکگ اَنت که ماناءِ وڑا نه اَنت
یک فولڈرےءَ آگهیءِ رنگ روژنا نه اَنت
لتا ءُ هائیده ءُ ناکو فیزکءِ جتا جتائیں ساز ءُ سئوت یکبرا
پِر اَنت سَرءِ پلیئرءَ
یکّ فولڈرےءَ مُلکی گپ ءُ مسله اَنت
سیاسی کار ءُ کسّه اَنت
انقلابی جیڑه اَنت
مُرید ءَ مرچی بیست ءُ پنچ فدائیءِ شهیدی هال مَنّتگ
لهتیں روچ اِنت هال نیست کمبرءِ
زامران داں بارکانءَ فوجی آپریشن اِنت
دومی نیمگا چه ریاستی رسانکدرءَ
”چودهری حماقت“ءِ تئوار کئیت
بجل اِت میشاں انگته، بهار کئیت
ملک مرچاں ایمِن اِنت
گوں شئیر ءُ گال ءُ گُشتناں که فولڈرےءَ کازی اِنت
نه مردماں چه دلجم اِنت
نئے وتا چه رازی اِنت
که باریءَ منارا بِل وتارا اوں نموکتگ
گوں بےمڑائیں کندگاں
گوں کوچرائیں کُنّتاں
واه کپوت، واه تئی مالءِ، واه ترا
اے دانچوپیں نوبتءَرا چوپگی اِنت هر وڑا
یک فولڈرے که سنجےءِ رهاماں چیر تَرّتگ
یک باری یے اگاں شُتگ، گُشنت دوبر نتَرِّتگ
اے زندگیءِ مولم اِنت په وتءَ زهیری اِنت
که پیچ وارت چو مارےءَ
زُومےءِ وڑا دَجیت
یک فولڈرے وتارا لوٹی روچے رنگےءَ رجیت
یک فولڈرےءَ ایوکا بلیده اِنت
هیبتانءِ هوٹل اِنت، اکسےءَ
موالیانی جنّت اِنت
زَبرّگ اِنت، چلیم ءُ چاه ءُ سُهبت اِنت
حوالدار پیرو اِنت
حسن کلندر اِنت، حبیب چانو اِنت، ازیز ٹَکّر اِنت
آ بیگهءَ کجام چراگءِ بَددعایے لَگته
که انگه په وتءَ نئیت
آ دمکاں پَد کُجا وتی بَباتگ اَنت
آ ساهتانی مُرگاں تاب دات سر کُجا وتی
لئیب لئیبءَ، مَسکرا، دُرها شُتنت یکبرا ءُ پشت کپته ایوکی
یک فولڈرےءَ رپتگین ءُ سِستگیں توامیں سنگتانی یات
انچو ایر اَنت پورا گرانیں جِنترے دلءِ سرا
یک فولڈرے اِروٹک اِنت
چارگءِ وڑا نه اِنت ءُ کسءَ پیش دارگءِ وڑا نه اِنت
مُحبتانی چاڑ اوں چو کاروباری اَیڈءَ
دیدگانی دیما مِرمرانک بنت ءُ پِر گوزنت
بُجنت ءُ آپ بنت چو تاکچهانی موم بتیاں
برے برے سویٹیءِ بشانگءَ وَ آزماں سرا کپیت
دو پئیک جونی واکرءِ، یک کنڈمے
ٹویلف پوانٹ اَیٹ ڈالرءَ کپیت
یک ترانگے چو وائرس زدیں پروگرامےءَ اَفیکٹڈ اِنت
درا نرؤت رجیکٹڈ اِنت
اے زندگی وتی تها
برے برے گُشئے بلاهیں اژدیایےءِ هڑکّهی دَپ اِنت
فَکڈ اَپ اِنت
توامیں جیڑگانی پیچ، پیچ بنت ءُ پَر رِچنت
منی هیالءِ اِسکرینءَ باز فولڈر اَنت، پچ اَنت
#Alijandad #balochipoetry #irbuledai