लैङ्गिक हिंसा विरुद्धको १६ दिने अभियान शुभारम्भ कार्यक्रममा कविता प्रस्तुत गर्दै विदुर नगरपालिका १ नम्बर वडाका पूर्व सदस्य रुपा थापा
उल्कापिण्डहरूको आयु रेखा?
सोच्ने गर्छु ति आत्माहरूलाई
एउटा मानिस भएर
प्रकृतिको काखमा
अन्तिम पल्ट निदाउनु भन्दा अगाडि
कति पल्ट रेटिन्छन् होलान् अचानोमा राखेर
एउटा स्त्री बनाउनको लागि ।
त्यति सजिलै कहाँ तयार हुन्छन र स्त्रीहरू
एउटा तातो कराहीमा
ताती रहेको संस्कारको तेलमा
तिनीहरूलाई तार्नु छ
अरिङ्गालका गोलाहरूलाई
उनीहरूका शरीरमा खन्याउनु छ
मेसिनमा राखेर
सपना देख्ने ति आँखाहरूलाई झिक्नु छ
गन्तव्यको पहिचान गर्न सक्ने
ति पाउहरुलाई काट्नु छ
र सोच्न सक्ने गिदीलाई झिक्नु छ ।
यसरी एउटा आत्माको
सम्पूर्ण पार्टपुर्जालाई बदलेर
तयार पार्नुछ यो धर्तीमा
स्त्री नामका रोबोटहरू र
आज्ञाकारी बन्ने बटम थिच्न
तयार पारिएका ति यन्त्रमानवको
प्रयोगशालामा कुनै वैज्ञानिकहरूले
जब भुलबस् थिचिदिन्छिन् विद्रोहको बटम
र ति अस्तित्वहरूले
आफूलाई खोज्न थाल्छन्
त्यसपछि आज्ञाकारी रोबोटको खोजीमा
निस्किएकाहरुको मस्तिष्कमा
पड्किएझैँ कुनै खतरनाक क्षेप्यास्त्र
कठघरामा उभ्याएर
बयान लिन्छन् स्त्रीको पाठेघरको ।
कुनै स्वास्नीमान्छेको पाठेघरमा
मर्यादा नाप्ने मेसिन सहित
दुरबिन लगाएर
न्यायालयमा जवाफ माँगिरहेकाहरू
के यति भनिदिनु सक्नु हुन्छ
जिन्दगीको अन्तिम गीत गाउनु भन्दा अगाडि
या भनौँ
अन्तिम भारी बिसाउनु भन्दा अगाडि
एउटा नारी देहको रूपमा तयार पारिएका
ती आत्माहरूलाई कति पल्ट मारिन्छन् ?
ओ महाशय
खोतल्नु छ मलाई इतिहासको भग्नावशेष
र उभ्याएर वर्तमानको कठघरामा
हजारौं स्त्रीहरूका चित्कारहरुसँगै
जलाइएका ति चिताहरुलाई सोध्नु छ
के उनीहरूका देह एक पटक मात्र जले?
झुसिल्किरो बाट पुतली बनेर उडिरहेका
ति अस्तित्वहरूको पखेटामा
नढाँटी कन भन्नुहोस् त
कति पटक डढेलो लगाउनु भयो हजुरले ?
के तपाईँहरूलाई अझै पनि लाग्छ
यो ब्रह्माण्डमा घुमिरहेका
स्त्री नामका ती उल्कापिण्डहरूको आत्मा
के यो धर्तीमा एक पटक मात्र विलय हुन्छन?
भन्नुहोस् त
ति उल्कापिण्डहरूकाे आयु रेखालाई
आखिर कसले निर्धारण गरिदिन्छ?