Chromepet, Tamil Nadu, Chennai, INDIA. குரோம்பேட்டை, தமிழ் நாடு, சென்னை, இந்தியா. Vlog - @nanmaisei1524
குரோம்பேட்டை
Chromepet
இந்தியாவின் தமிழ்நாடு மாநிலத்திலுள்ள சென்னை மாநகரத்தின் தெற்குப்பகுதியில் அமைந்துள்ள ஒரு புறநகர்ப்பகுதியாகும். தேசிய நெடுஞ்சாலை எண் 45-இல் பல்லாவரத்திற்கும், தாம்பரத்திற்கும் இடையில் இக்குடியிருப்பு பகுதி அமைந்துள்ளது. இங்கிருந்து சென்னை பன்னாட்டு வானூர்தி நிலையம் 4 கி.மீ. தொலைவில் உள்ளது. சென்னை மத்திய தொடருந்து நிலையம் 22 கிலோமீட்டர் தொலைவில் அமைந்துள்ளது. புகழ்பெற்ற சென்னை தொழில்நுட்ப நிறுவனம் எனும் பொறியியல் கல்லூரி இங்குதான் அமைந்துள்ளது. இந்திய முன்னாள் குடியரசுத் தலைவர் திரு. ஆ. ப. ஜெ. அப்துல் கலாம், தமிழ் எழுத்தாளர் சுஜாதா ஆகியோர் இக்கல்லூரியில்தான் படித்தனர் என்பது இந்நிறுவனத்தின் சிறப்பாகும். சென்னை புறநகர் இரயில்வே வலையமைப்பில் இடம்பெற்றுள்ள குரோம்பேட்டை இரயில் நிலையம் இந்த பகுதிக்கான தொடருந்து போக்குவரத்து சேவையை அளிக்கிறது. ஓர் அமைதியான குடியிருப்புப் பகுதியான குரோம்பேட்டை.
குரோம்பேட்டை என்பது ஒரு தமிழ் பெயர் அல்ல. முன்னதாக இந்த நகரம் குரோம் தோல் தொழிற்சாலையின் இல்லமாக இருந்தது [1]. எனவே - குரோம் என்பது தொழிற்சாலையையும் பேட்டை என்பது புற நகரையும் குறிப்பதால் குரோம்பேட்டை என்ற பெயர் வந்தது. தொழிற்சாலை முற்றிலுமாக இடிக்கப்பட்டு அதன் இடத்தில் பாலாஜி மருத்துவமனைகள் கட்டப்பட்டுள்ளன. ஆனால் குரோம்பேட்டை காவல் நிலையத்திற்கு அடுத்துள்ள சாலையின் வழியாக நடக்கும்போது தோல் தொழிற்சாலையின் தடயங்களை அதன் பெயர் பலகையுடன் ஒருவர் இன்னும் காணமுடியும். பொ.ஊ. 1 முதல் 2-ஆம் நூற்றாண்டு வரை ஆரம்பகால சோழர்களுடன் கூட்டணி வைத்திருந்த தொண்டைமான்கள் ஆட்சி செய்த தொண்டைமண்டலத்தின் ஒரு பகுதியாக குரோம்பேட்டை பகுதி இருந்தது. பின்னர் அந்த பகுதி சாதவாகணர்களின் தலைவர்களுக்கு வழங்கப்பட்டது. பல்லவர்களின் ஆட்சிக்காலத்தில் பொ.ஊ. 3 முதல் 7-ஆம் நூற்றாண்டு வரை சென்னை, செங்கல்பட்டு மற்றும் சுற்றியுள்ள பகுதி தொண்டை நாட்டுக்கு சொந்தமானதாக இருந்தன. வரலாற்று காலம் சரியாக பல்லவ மன்னர்களிடமிருந்து தொடங்குகிறது. பல்லாவரத்திற்கு அருகில் பொ.ஊ. 600-630 [2] காலத்தில் மகேந்திரவர்மனால் குடையப்பட்ட பல்லவபுரம் குகைக்கோவில்களில் இருக்கும் கல்வெட்டுகள் இதற்குச் சான்றாக உள்ளன. மகேந்திரவர்மனுக்குப் பின் வந்த நரசிம்மவர்மன் சாளுக்கிய வம்சத்தைச் சேர்ந்த புலிகேசிக்கு எதிராகப் போரிட்டு, குரோம்பேட்டையிலிருந்து 11 கி.மீ. (6.8 மைல்) தென்மேற்கே உள்ள மணிமங்கலத்தில் அவரைத் தோற்கடித்தார்.