Художон, дунёни тинчлантириб бер,
Оллоҳим оламни овутиб қўйгин.
Қайноқ урушларнинг бошини силаб,
Музқаймоқлар бериб совутиб қўйгин.
Художон, армонни олдинга чақир,
Гўдаклар кўзига ботган армонни.
Мультфильм қўйиб бер, мўлтираб қараб,
Қиқирлаб кулдирсин жумла жахонни.
Оллохим орзулар ушалмасми айт?
Оқармай тупроққа қоришса сочлар.
Дод десам, фалакнинг парвойи фалак
Кўрмасам кўзимни ютади очлар.
Дардларни чақириб олгин, Художон,
Ўлимни чалғитиб ўйинчоқлар бер...
Бешик, беланчакка мўралаб турган.
Ажални алдатиб қўғирчоқлар бер!
Жохилни жахонга устун қилмагин
Терорнинг тилини сайратиб қўйма.
Охират майлику, бу фанода ҳам.
Одамкуш бандангни яйратиб қўйма!
Аламни чақиргин, аламзада кўп.
Меҳрга ташналар меҳрга қонсин.
Эртакка айланиб қолмай бу дунё.
Эртаклар болажон дунёга қолсин!...
Художон, денёни тинчлантириб бер!
Муаззам ИБРОҲИМОВА