ಎಲ್ಲರಿಗೂ ನಮಸ್ಕಾರ.

2015ರಿಂದ ನಾವು ಕೆಲವು ಗೆಳೆಯರು ಪ್ರತಿ ತಿಂಗಳು ಒಂದು ಭಾನುವಾರ ಸೇರಿ 'ಪದಯಾತ್ರೆ' ಎಂಬ ಅನೌಪಚಾರಿಕ ಕಾರ್ಯಕ್ರಮವನ್ನು ನಡೆಸಿಕೊಂಡು ಬರುತ್ತಿದ್ದೇವೆ. ಕವಿತೆಯ ಬಗ್ಗೆ ಅಪಾರ ಒಲವು ಬೆಳೆಸಿಕೊಂಡ ಎಲ್ಲರಿಗೂ ಭಾಗವಹಿಸಲು, ಕವನಗಳನ್ನು ಓದಿ, ಕೇಳಿ, ಹಂಚಿಕೊಳ್ಳಲು ಒಂದು ಪುಟ್ಟ, ನಮ್ರ ಅವಕಾಶ.

ಎರಡು ಸುತ್ತುಗಳ 'ಪದಯಾತ್ರೆ'ಯಲ್ಲಿ, ನಮ್ಮ ನೆಚ್ಚಿನ ಕವಿಗಳು ಹಾಗೂ ನಮ್ಮಲ್ಲೇ ಬರೆಯುವ ಗೀಳು ಬೆಳೆಸಿಕೊಂಡ ಕೆಲವರು ಕವನಗಳನ್ನು ಓದುತ್ತೇವೆ. ಬೆಂಗಳೂರಿನಲ್ಲಿ ನೆಲೆಸಿರುವ ಕನ್ನಡಿಗರೇ ಅಲ್ಲದೇ, ಯೂರೋಪ್, ಅಮೆರಿಕಗಳಲ್ಲಿ ನೆಲೆಸಿರುವ ಕನ್ನಡಿಗರೂ ಸ್ಕೈಪ್, ಫೇಸ್ಬುಕ್, ಹಾಗೂ ಗೂಗಲ್ ಟಾಕ್ಸ್ ಮೂಲಕ ಭಾಗವಹಿಸುತ್ತಿದ್ದಾರೆ.

ಆದರೆ 'ಪದಯಾತ್ರೆ'ಗೆ ನಾವು ಸೇರುವ ಭಾನುವಾರ ಬಿಡುವಿಲ್ಲದ ಹಲವರು ವಿಷಾದ ವ್ಯಕ್ತಪಡಿಸಿರುವುದರಿಂದ, ಅದನ್ನು ದೃಶ್ಯ ಮಾಧ್ಯಮಕ್ಕೆ ತರುವ ನಮ್ಮ ಪುಟ್ಟ ಪ್ರಯತ್ನವಿದು. ಇದಕ್ಕೆ ಯಾವುದೇ ಕ್ರಮವಿಲ್ಲ. ಒಂದು ಮುದ್ದಾದ, ಮುಗ್ಧವಾದ ಅಶಿಸ್ತಿನಲ್ಲೇ, ಆಯಾ ವಾರ ನಮಗೆ ಸಿಕ್ಕ ಕವಿಗಳ ಕವನ ಸಂಕಲನಗಳಿಂದ ಕವನಗಳನ್ನು ಓದುತ್ತೇವೆ. ಕವನಗಳ ವಿಮರ್ಶೆ ಮಾಡುವ ಯಾವ ಉದ್ದೇಶವೂ ನಮ್ಮದಲ್ಲ, ಹಾಗಾಗಿ ಓದಿಯಷ್ಟೇ ಮುಗಿಸುತ್ತೇವೆ. ಆ ಕವನ ಕಾಡಿದರೆ, ಆ ಸಂಕಲನ ಕೊಂಡು ಓದಲಿ ಎಂಬ, ಓದೆಂಬ ಗೀಳು ಮತ್ತಷ್ಟು ಜನರಿಗೆ ಹರಡಲಿ ಎಂಬ ಪುಟ್ಟ ಹಂಬಲ. 'ಪದಯಾತ್ರೆ' ಸಾಗುತಲಿರಲಿ. ನಿಮ್ಮ ಹಾರೈಕೆಯಿರಲಿ.

ನಮಸ್ಕಾರ