මගේ ටියුෂන් ජීවිතයට දැන් අවුරුදු දහය යි.මේ ගෙවී ගිය අවුරුදු දහය තුළ මට ගොඩාක් සිසුන් මුණගැහිලා තියෙනවා.මම දහස් ගණන් සිසුන්ට උගන්වලා තියෙනවා.දෙදහසකට වඩා සිසුන් සරසවියට යවලා තියෙනවා.මේ පිරිස අතුරින් මට හමුවුණු විශේෂිත චරිතයක් තමයි තීක්ෂණ කියන්නේ.එයා ඇස් දෙක නොපෙනෙන අන්ධ පුතෙක්.
මීට අවුරුදු දෙකකට කලින් අනුරාධපුර මාගේ A/L 2024 කණ්ඩායමට තමයි තීක්ෂණ එන්නේ.තවමත් එයා මගෙන් ඉගෙනගන්නවා.තව සති කිහිපයකින් මේ සැරේ උසස් පෙළ විභාගයටත් මුහුණ දෙනවා.මට මතක විදිහට මේ පුතා ගෙවීගිය අවුරුදු දෙක තුළ ම පන්ති ඇවිත් නැත්තේ එක දවසක් පමණයි.ඔහුගේ පාසලේ Media Day එක තිබුණු නිසා තමයි එදත් එයාට එන්න වෙන්න බැරි වුණේ.ඔහු ඇත්තට ම දක්ෂයෙක්.ඉගෙනගන්න උපන් හපනෙක්.සාමාන්‍ය පෙළත් ඉහළින් ම සමත්වෙලා තමයි උසස් පෙළට ඇවිල්ලා තියෙන්නේ.අපේ පන්තියේ මේ වෙනකොට ලියපු හැම Paper එකකට ම එයාට ඉහළ ලකුණු තියෙනවා.ඒ ලකුණු අතර ඔහු පන්තියේ ප්‍රථම , දෙවන හෝ තෙවන ස්ථාන අතරට එනවා ම යි.ඔහු මට සතියකට Whatsapp වලින් විසි තිස් වතාවක් කතාකරලා විෂය කරුණු විමසනවා.ඔහු ඇත්තට ම අධ්‍යාපනයෙන් ජීවිතය දිනන ළමයින්ට පරමාදර්ශයක්.මම එකක් හොඳින් ම දන්නවා.තීක්ෂණ උසස් පෙළත් ඉහළින් ම සමත්වෙන්නේ අනුරාධපුර දිස්ත්‍රික් කුසලතාවක් ද හිමිකරගෙන යි.
ඒ වගේ ම ඔහු සංගීතයට උපන් හපනෙක්.ඔහු ඔහුට ම කියලා TH-cam chanel එකක් මෙන් ම Whatsapp Channel එකක් කරනවා.ඔහු දක්ෂ නිවේදකයෙක්.මට වෙලාවකට එයා ම Voice කරලා හදපු Advertisement පවා එවනවා.
ඔහු එක්තරා දිනක මට අදහාගත නොහැකි වටිනා තෑග්ගක් දුන්නා.ඔහුට මා ගැන දැනුණු විදිහ ගීතයකට ගොනු කරලා ඔහු ම ඒ ගීතය සංගීතවත් කරලා ඔහු ම එය පටිගත කරලා දුන්නා.ඒ ගීතය ඇහුව පළමු වතාවේදී මගේ ඇස් දෙකට කඳුළුත් ආවා.ඇත්තට එයා මාව ඇස් දෙක නොපෙනුනත් හදවතින් ස්පර්ශ කරලා තියෙන විදිහ හරි පුදුමයි කියලා මට හිතුණා.
මම මේ ගීතයට වටිනාකමක් දෙන්න තීරණය කළා.ඒ වෙලාවේ ම මම කතාකරා සකුණට.එයා මගෙන් ඉගෙන කැලණියේ සිනමා හා රූපවාහිනි උපාධිය අරගෙන දැනට ලංකාවේ වෘත්තීමය Digital Creator කෙනෙක්.මම මේ සින්දුව එයාට යවලා මේකට අපි මොකක් හරි කරමු කිව්වා.සකුණ එයාගේ Crew එකත් එක්ක කොළඹ ඉදලා එක දවසක් අනුරාධපුරයට ඇවිල්ලා 2024 පන්තියේදී ම පොඩි පොඩි Recoridings ටිකක් කරගෙන ගියා.ඊට පස්සේ මට තීක්ෂණගේ ගීතයට ලස්සන Video එකක් කරලා දුන්නා.අන්න ඒ වීඩියෝව තමයි ඔබ දැන් අහන්නේ...බලන්නේ...
තීක්ෂණ අපට ලොකු පණිවිඩයක් දීලා තියෙනවා.ඒ ජීවිතයේ උත්සාහය සහ කැපවීම තියෙනවා නම් කළ නොහැක්කක් නොමැති බව යි.
සිංහල කුමසාරු
#educationsinhala #education #sinhalakumasaru #al2026 #sinhala