साहित्यरत्न लोकशाहीर अण्णाभाऊ साठे (Annabhau Sathe) यांच्या जयंतीनिमित्त उक्कडगांव ता.बार्शी येथील सकल मातंग समाजाच्यावतीने दिनांक ३० ऑगस्ट २०२४ रोजी आयोजित केलेले सुप्रसिद्ध वक्ते तथा लेखक प्रा.विशाल गरड यांचे लोकव्याख्यान.
लोकव्याख्यानाचा वृत्तांत :
आजचे लोकव्याख्यान आमच्या पांगरीपासून सहा किलोमीटर अंतरावर असलेल्या उक्कडगावला होते. साहित्यरत्न अण्णाभाऊ साठे जयंतीनिमित्त आयोजित केलेल्या लोकव्याख्यांसाठी मी अवघ्या दहा मिनिटांत उक्कडगावात पोहोचलो. गाडीतून उतरताच पोरांनी स्वागत केले. तिथून मग माणसं गोळा करत करत आम्ही चालतच मागवड्यात गेलो. तेथील समाजमंदिरासमोर छोटेखानी मंडप टाकून माईक लावला होता. अण्णाभाऊचे विचार सांगायला आलोय हे कळताच हळू हळू श्रोते यायला लागले. प्रारंभीला अण्णांच्या प्रतिमेचे पूजन करून त्यांना अभिवादन केले मग आयोजकांचा सत्कार स्विकारून मी बोलायला उभा ठाकलो. जग बदल घालुनी घाव सांगुनी गेले मज भीमराव. हे अण्णाभाऊंचे वाक्य आज सत्यात उतरवून श्रोत्यांच्या मनावर विचारांचे घाव घालून त्यांची मने बदलण्याचा प्रयत्न केला. इतरत्र बसलेले श्रोतेही तल्लीन होवून विचार ऐकत होते तर काहीजण शुटींग काढत होते.
व्याख्यान सुरू असतानाच अचानक पाऊस सुरू झाल्याने. मी लेकरांना पुढे सरकण्यास सांगितले. माझ्या सभोवताली बसलेल्या श्रोत्यांवर पाऊस आणि माझे शब्द एकसाथ बरसत होते. काहीवेळाने माझ्यावरही पाण्याचा अभिषेक सुरु झालेला दिसताच विष्णू ने छत्री धरली पण व्याख्यानात खंड पडू दिला नाही. अण्णांसोबतच लहुजी वस्ताद साळवे यांच्याही चरित्राला स्पर्श करून प्रबोधन केले. पडत्या पावसातही बाल अबाल वृद्धानी तुफान प्रतिसाद दिला. नंतर लाईट गेल्याने समाजमंदिरात बसून थोडा वेळ चर्चा केली व लाईट आल्यावर पोरांची फोटोंची इच्छा पूर्ण करण्यासाठी पुन्हा मंडपात येवून थांबलो. त्यांच्या प्रत्येकाच्या चेहऱ्यावरचा आनंद पाहून मी सुखावलो. प्रचंड संघर्ष करुन लोकशाहीर आणि साहित्यरत्न झालेल्या अण्णांचा तेजस्वी विचार पेरुन मी सर्वांचा निरोप घेतला. शब्दांनी जिकलेल्या या माणसांचं प्रेम, जिव्हाळा आणि आदर सोबत घेवून मी पांगरीकडे रवाना झालो. भुरभुर पावसाच्या सोबतच रात्री दहाच्या सुमारास घरी पोहोचलो.
प्रा.विशाल गरड
संपर्क : ८८८८५३५२८२