لە سەمینارێکدا؛ #سەرۆکی_ڕێکخراوی_چمک
تاووتوێی خوێندەواریی میدیایی و دیجیتاڵیی دەکات
چمک، سلێمانی: دەستەی كوردستانیی بۆ دیراساتی ستراتیجیی و توێژینەوەی زانستیی میوانداریی د.شوان ئادەم ئەیڤەس؛ سەرۆکی ڕێکخراوی چاودێریی میدیای کوردیی کرد بۆ پێشکەشکردنی سەمینارێک لەبارەی «خوێندەواریی میدیایی و دیجیتاڵیی لەنێو ژینگەی پەروەردە و خوێندنی باڵادا».
ئەو سەمینارە؛ ڕۆژی یەكشەممە (03ی تشرینی دووهەمی 2024) لە هۆڵی داروین لە سلێمانی ڕێکخرا و تێیدا ئاماژە بە گرنگیی ناساندن و تێگەیشتن و پێویستیی کارکردن بە ڕەگەزەکانی هەریەک لە خوێندەواریی میدیایی و خوێندەواریی دیجیتاڵیی لە پڕۆسەی بەرهەمهێنان و بەکارهێنانی زانیاریی، وانەخوێندن، وانەوتنەوە و توێژینەوەی زانستیی لەنێوەندە میدیایی، پەروەردەیی و ئەکادیمییەکانی هەرێمی کوردستاندا کرا و دەرفەت و ئاڵەنگارییەکانی سەرپێخستنی ئەمجۆرە خوێندەوارییە لە وڵاتانی خۆرئاوا و خۆرهەڵات، لەنێویشیاندا کوردستان خرانەڕوو.
د.شوان ئادەم ئەیڤەس؛ پڕۆفیسۆری یاریدەدەر لە خوێندنی کەمیونیکەیشن، کولتوور و میدیا لە زانکۆی پۆلیتەکنیکی سلێمانی، دامەزرێنەری تۆڕی ئەكادیمیی كوردیی و سەرۆكی رێكخراوی چاودێریی میدیای كوردیی (چمك) و سەرنووسەری گۆڤاری دەرگاوان بۆ پەروەردەی میدیایی_ە.