گمر مذنب
شمتاني بعد!
شتراجع!
شتحسب!
موبردو بحضنك مثل ماي الحب
لمن تكثر اعذار التحبهم روح
قبل لاتنطرد ويطول المغرب
لاتسأل شلون! وليش! وشسويت!
ضم اسألتك ودمعك ولاتعتب
موبس انت كل الصدگ مامريود
دوم الوحده المايعرف يچذب
غريب الضوه بشباچ القطار يفوت
وبليل الحراميه الگمر مذنب
هيه الوان والابيض يضل هلال
بأول يوم من عمره بجي محدب
ها ياگلبي ياطيب
اليوم اصوابك من اللب
تمشي وتلتفت ياحلم اليأذيك
شضايع منك ومابيك تستوعب
شناسين بلامح وجهك المهجور
ليش گبال المرايات مستغرب
ياطين الغويب شچم وطن بچويك
خساراتك وجوه وخارطه شتحسب
ضم دمعك بعد ماجاب اليتعب
موكل النزف بأول شكو تبدي
بعدك ماضگت شي جايك المغرب
بعدك مامطلع الصور تالي الليل
وبگفاهن مختنگ ماتعرف شتكتب
بعدم مانفردت بيك الولايات
وروحك تشتهي عكس الدروب تهب
باچر وحدك وليل غابة يصير
وبالميته النجوم البارده تحطب
من بين الشجر تمتد اچفوف الخوف
والعافوك ريح اصواتهم ترعب
الاغاني الماتعجبك باجر تبچيك
وحدك والبرد نار بحمامة يشب
تجمع بالمطر وتگله مايسوون
لاتوگع الياهو الچان متغرب
جريده بجامه باچر كلها تتعداك
بس حزنك يضل بوراقك مچلب