जागतिक मराठी अकादमी व डॉ. डी. वाय. पाटील विद्यापीठ, पिंपरी, पुणे यांच्या वतीने ६ ते ८ जानेवारी दरम्यान २०२३ मध्ये 'शोध मराठी मनाचा २०२३' हे १८ वे जागतिक मराठी संमेलन आयोजित केले होते. डॉ. ज्ञानेश्वर मुळे संमेलनाध्यक्ष होते. डॉ. पी. डी. पाटील, कुलपती, डॉ. डी. वाय. पाटील विद्यापीठ, पिंपरी, पुणे हे संमेलनाचे स्वागताध्यक्ष होते. या संमेलनाचे उद्घाटन ज्येष्ठ नेते शरद पवार यांनी केले. डॉ. मोहन आगाशे आणि अमेरिकन खासदार श्री ठाणेदार यांना जागतिक मराठी भूषण पुरस्कार देऊन गौरवण्यात आले. या संमेलनात जगभरातील मराठी कर्तृत्ववान मान्यवरांचा सहभाग होता. श्री ठाणेदार, गोविंद गावडे, राज ठाकरे, नागराज मंजुळे, सुबोध भावे, सयाजी शिंदे, प्रवीण तरडे यांच्या मुलाखतींना तसेच परदेशातील मान्यवरांचा सहभाग असलेल्या परिसंवाद व चर्चासत्रांना रसिकांचा उदंड प्रतिसाद मिळाला.