डॉक्टरांना देवदूत मानले जाते. मात्र, एका डॉक्टराने एक दोन नव्हे शेकडो मुली, तरुणी तसेच विवाहित महिलांचे शोषण केल्याचा धक्कादायक प्रकार हुडकेश्वर पोलीस ठाण्याच्या परिसरात उघडकीस आला. या नराधमाला अटक करून त्याची मध्यवर्ती कारागृहात रवानगी करण्यात आली आहे.
मागील १५ वर्षांपासून हा मानसोपचारतज्ज्ञ रुग्णांवर उपचार करीत असून महिलांशी अश्लील कृत्य करतानाच तो चित्रफीत तयार करायचा , पीडितांना ब्लॅकमेल करून वारंवार शारीरिक संबंध ठेवायचा अशी माहिती समोर आली आहे. यातीलच तीन पीडितांनी हिंमत दाखवित त्याच्याविरुद्ध तक्रार दिल्यानंतर हा प्रकार उघडकीस आला. स्वतः पोलीस आयुक्त रवींद्र सिंघल यांनी आता हे प्रकरण गांभीर्याने घेतले आहे.
मानसोपचारतज्ज्ञ आरोपी राजेश याने हुडकेश्वर येथील राहत्या घरी क्लिनिक उघडले होते. तो अनेकदा सहलीचे आयोजनही करायचा. उपचारासाठी आलेल्या अल्पवयीन मुली, विवाहित महिला आणि तरुणींशी अश्लील चाळे करताना तो चित्रफिती तयार करायचा. याव्यतिरिक्त थेट क्लिनिकमध्ये त्याने अनेक महिलांशी शारीरिक संबंध प्रस्थापित केले होते. या चित्रफिती संबंधित मुली, तरुणी, महिलांना दाखवत तो त्यांना वारंवार शारीरिक संबंध ठेवण्यासाठी भाग पाडायचा. सहलीच्या आयोजनात तो अनेकदा हॉटेल किंवा फार्महाऊसवर पीडितांवर लैंगिक अत्याचार करायचा. याप्रकरणी पोलिसांनी राजेशविरुद्ध गुन्हा दाखल करून त्याला अटक केली आहे. त्याने गुन्ह्याची कबुली दिल्यानंतर त्याची मध्यवर्ती कारागृहात रवानगी करण्यात आली आहे. राजेशची पत्नी फरार असून त्याने तिचेही लैंगिक शोषण केले असून बलात्काराचा गुन्हा दाखल होण्याच्या भीतीपोटी राजेशने तिच्याशी लग्न केल्याची माहिती सूत्रांनी दिली आहे.
पोलिसांनी आरोपी मानसोपचार तज्ज्ञाच्या कार्यालयातून एक हार्ड डिस्क जप्त केली असून त्यामध्ये अनेक आक्षेपार्ह फोटो व्हिडिओ आढळल्याची पोलीस सूत्रांची माहिती आहे. त्यामुळे आरोपी मानसोपचार तज्ज्ञाने आजवर अनेक तरुणी आणि अल्पवयीन मुलींसोबत गैरकृत्य केले असावे असा पोलिसांचा अंदाज आहे