మన ముందుగా పోవుచున్న దేవునితో ఒక సంవత్సరము
"నేను నీకు ముందుగా పోవుచు మెట్టగానున్న స్థలములను సరాళము చేసేదను. ఇత్తడి తలుపులను పగులగొట్టెదను ఇనుపగడియలను విడ గొట్టెదను అంధకారస్థలములలో ఉంచబడిన నిధులను రహస్య స్థలములలోని మరుగైన ధనమును నీకిచ్చెదను" (యెష. 45:2,3).
ఈ నూతన సంవత్సరములో ఈ వాగ్దానము మనకొరకు నిజముగా నెరవేరును. నిశ్చయముగా ప్రభువు మనకు ముందుగా పోవుదురు. మెట్టగానున్న పరిస్థితులను మూర్ఖులైన ప్రజలను మనము ఎదుర్కొనవచ్చును. అయినను మనము ప్రభువుని వెంబడించినయెడల ఆయన వాటిని (వారిని) సరాళము చేయును. మనయొక్క ఆత్మీయ అభివృద్ధిని అడ్డుపరచి నిలిపివేయునంతగా బెదరించునట్టి ఇత్తడి తలుపులు, ఇనుపగడియలవంటి ఎన్నో ఆటంకములను ఎదుర్కొనవలసి వచ్చునేమో! అయితే ప్రభువు తానే అటువంటి ఇత్తడి తలుపులను చిన్నాభిన్నములుగా పగులగొట్టి, ఇనుప గడియలను విడగొట్టెదరు.
"అంధకారస్థలములలో ఉంచబడిన నిధులు" - మనయొక్క మార్గములో అచ్చటచ్చట కొన్ని అంధకారపు అతుకులు మాసికలు ఉండవచ్చును; అయినను అంధకారములో ఉన్న ఎన్నో అమూల్యమైన విలువైన ఆత్మలను విశేషమైన నిధులుగా ఈ సంవత్సరము మన కిచ్చెదనని ప్రభువే స్వయముగా వాగ్దానము చేసియున్నారు.
"రహస్య స్థలములలోని మరుగైన ధనము" - ఇచ్చట 'రహస్య స్థలములు' అనగా మనము 'మహోన్నతుని చాటున నివసించుట' యైయున్నది, అనగా ప్రార్ధన జీవితమనెడి రహస్య గదిని చూపించు చున్నది (కీర్త. 91:1), ఎవరైతే ఒక లోతైన ప్రార్థన జీవితము కలిగి యుందురో అట్టివారికి మరుగైన ధనము ఉంచబడియున్నది.
ఇశ్రాయేలీయులవలెనే, మనము కూడ అరణ్యయాత్రలో ఉన్నాము. అయితే ప్రభువు తానే మన ముందుగా వెళ్లెదనని వాగ్దానము చేసిరి. "నా సన్నిధి నీకు తోడుగా (ముందుగా) వచ్చును (వెళ్లును, నేను నీకు విశ్రాంతి కలుగజేసిదననెను" (నిర్గమ. 33:14). మనకు విశ్రాంతి నిచ్చుటకు ఆయన సన్నిధి మన ముందుగా పోవుచున్నది. మనము మనయొక్క నిత్య విశ్రాంతిలో చేరువరకు ఆయన సన్నిధి మనతో కూడ వచ్చును.
"నా సన్నిధి మీతో నిలిచియుండును" అని కాదు, గాని "నా సన్నిధి నీకు తోడుగా వచ్చును" అని ప్రభువు చెప్పిరి. దేవుని సన్నిధి అనుదానిలో ముందుకుసాగి వెళ్లుట అనునది కలదు. అది మనలను ముందుకు సాగిపోజేయును; అది మనలను ముందుకు సాగిపోవునట్టి తీవ్రమైన క్రైస్తవునిగా చేయును. సువార్తకు ముందుకు సాగిపోవునట్టి శక్తి కలదు. "కాబట్టి మీరు వెళ్లి, సమస్త జనులను శిష్యులనుగా చేయుడి...ఇదిగో సదాకాలము మీతో కూడ ఉన్నాను" (మత్త 28:19,20): "యెహోవా మీ పక్షమున యుద్ధము చేయును సాగిపోవుడి" (నిర్గమ. 14:14,15). మనము ముందుకు సాగిపోవుచు ఉన్నట్లయితే, ఆ షరతుమీద ఈ నూతన సంవత్సరములో మన యుద్ధములన్నిటిని ప్రభువే జరిగించవలెనని కోరుచున్నాడు.
మనయొక్క భవిష్యత్తు ప్రభువుయొక్క హస్తములో ఉండిన యెడల అది ఆశీర్వదింపబడినదిగా ఉండబోవునని మన మెరుగుదుము. నిశ్చయముగా ఆయన మనకొరకు మహా గొప్ప సంకల్పములు కలిగియున్నాడు. ఈ సంవత్సరము మనము దాటి వెళ్లు మార్గములుమనకు తెలియకపోవచ్చును. కాని మన ముందుగా వెళ్లునది. ఎవరో మనకు తెలియును. ఈలాగు తెలిసికొనుటలోనే అసలు తేడా కలదు.
"యెహోవా నిన్ను నిత్యము నడిపించును. క్షామకాలమున ఆయన నిన్ను తృప్తిపరచి నీ యెముకలను బలపరచును. నీవు నీరు కట్టిన తోటవలెను ఎప్పుడును ఉబుకుచుండు నీటి ఊటవలెను ఉండెదవు " (యెష 58:11).
"చీకటిని వెలుగుగా జేసీ
ఆయన నీ ముందు పోవువాడు
సత్యమగు జీవమగు మార్గము యేసే దేవునియందు నిరీక్షణనుంచి
ఆయనను స్తుతించు నా ప్రాణమా!"
--::--