‎
كلمات : بشير حمد شنان
الف اولف من جديد المعاني
‎في حب غض العود صافي الثماني
‎اللي خياله تالي الليل جاني
‎ونقض جروحٍ في الحشى داخلية
‎والباء بدل ما ترقد الليل عيني
‎عافت لذيذ النوم يا مسلميني
‎ماعاد لي ناصر ولا لي عويني
‎ولولا الرجاء زاورت حوض المنية
‎والتاء تمكن صاحبي من فؤادي
‎ وخزاني وشمت علي المعادي
‎كلن عرف ما صار حضر وبوادي
‎واللي جرى كله مقدر عليه
‎والثاء ثنيت الرجل ما افارق البيت
‎واصبحت انا لاني بحين ولا ميت
‎امشي بغير شعور ان رحت وان جيت
‎فارقت خلاني وكل الدنيه
‎والحاء حرمني من لذيذ المنامي
‎جسمي قضى ما باقي الا عظامي
‎غيروا رايه ناقلين الكلامي
‎بعد المعرفه كبر راسه عليه
‎والخاء خدمت الزين في كل حاجه
‎واشعلت من بعد الظلايم اسراجه
‎وعدلت انا ممشاه بعد العواجه
‎احسبه مخلص واثر له كم نيه
‎والدا دروب الحب ماهي بعيبي
‎والله لولا الميز لاشق جيبي
‎لاشك اقول ما دام هذا نصيبي
‎ما ينجزع من حكم رب البريه
‎والذال ذللني غريمي بقوة
‎غصبن علي والله ماهي مروة
ياللي تعرف بقيق بالقلب ضوة
‎تكفون طفوا النار ياهل الحمية
‎والراء رماني في بحور المشاكل
‎وهذي ثلاث ايام لا اشرب ولا اكل
‎والقلب ما طاوع كلام العواذل
‎يقول ما ارضى غير جالي الثنيه
‎والزاء زمان الضيم مافيه راحه
‎مافيه من يعطيك كلمة صراحه
‎حرفين صح وعشرة احرف ارجاحه
‎ يجيك في نيه وله الف نيه
‎والسين سدي ما درى عنه مخلوق
‎اوزن كلامي كل ماقلت منطوق
‎سفرت سدي يم سطح القمر فوق
‎محدن درى به غير رب البريه
‎والشين شان الحال ياقايد الريم
‎وانت متعلم ما اظن تحتاج تعليم
‎يكفيني اللي ذقت من الهم والضيم
‎هذي جروحك في ضميري طريه
‎والطاء طماط الخرج كنه خدودك
‎ وليمون ابو زهيره يشابه نهودك
‎ويا ما حلى لبس الذهب في زنودك
‎والعين فيها الخنجر الحضرمية
‎والضاء ضناني صاحبي في الموده
‎وانا اشهد ان الصبر قد وصل حده
‎وامر الولي ما يقدر احدن يرده
‎الواحد المعبود جزل العطيه
‎والعين عميت عين من فرقونا
‎من عقب جمعانا سوى شتتونا
‎وعقب المسرة والهنا عذبونا
‎حسبي عليهم كل صبح وعشيه
‎والغين غامرت بحياتي وفاديت
‎وارخصت روحي فداك ياشمعة البيت
‎ليتك قريب البارحه يوم ونيت
‎امسح دموع العين وافرك يديه
‎والفاء فريد الشان فيك ابتلاني
‎وفي بحر حبك ياحبيبي رماني
‎وانا اشهد ان الله بعرفك دهاني
‎تخطي علي ثمٍ تشره عليه
‎والقاف قاري الخط يفهم معانيه
‎ويكتب جواب الخط راسن لراعيه
‎وارسلت مكتوبي وانا في حراويه
‎ما احسبك بالقرطاس تبخل عليه
‎واللام لاتنسى ليالي السعادة
‎مادام لك فينا غرامٍ ورادة
‎لاوهني مكبرين الوسادة
‎حياتهم دايم حياةٍ شهية
‎والكاف كانك يا حياتي تبينا
‎تكرم بقرطاس وارسل علينا
‎واترك كلام العذل والحاسدينا
‎طمن فؤادٍ فيه تسعين كيه
‎والميم مروني ولو في الشهر يوم
‎ينشرح صدر اللي مولع ومكتوم
‎يمكن الى شفتك يجي عيني النوم
‎لو ساعةٍ وحده ارقدها هنيه
‎والنون نامت كل عينٍ براحه
‎الا فؤادي زايدات جراحه
‎ماصدق من قال الهوى فيه راحه
‎اكبر كذوبٍ خلق رب البريه
‎والواء ونيني اشتكى منه جاري
‎طاولتهم بالنوح ليل ونهاري
‎عقب الونين اشهق واكسر عباري
‎خطرن علي ازور حوض المنية
‎والياء يمين الشرع زبدة كلامي
‎لانسى الذي طاوع عيال الحرامي
‎لو تنمحي الجلدة وتظهر عظامي
‎وتدري الحضر والبادية بالقضية